Исторический музей "Наша Эпоха"Главная страницаКарта сайтаКонтакты
Наша Эпоха
Наша Эпоха Наша Эпоха Наша Эпоха
   

Царский молитвослов

 

Служба с акафистом Святым Благоверным Царственным Великомученикам Николаю, Александре, Алексию, Ольге, Татиане, Марии, Анастасии, егда им пострадати за грехи народа русскаго

 

Месяца июля в 4-й день.

 

Служба с акафистом

Святым Благоверным

Царственным Великомученикам

Николаю, Александре, Алексию,

Ольге, Татиане, Марии, Анастасии,

егда им пострадати за грехи народа русскаго[1]

 

НА ВЕЛИЦЕЙ ВЕЧЕРНИ

 

Блажен муж, первый антифон.

 

На Господи воззвах стихиры царя глас 5:

 

Якоже святии князие Борис и Глеб побеждаем желанием будущих, паче же любовию Христовою, царство земное и славу возненавидел еси, чистоту же возлюбил еси, и неправедное убийство претерпел еси, никакоже противляшеся предающему тя народу, темже и предстатель за народ свой являешися, о царю мучениче, о Ангеле земли Российския, о заступниче наш небесный, моли спастися душам нашим.

 

Вящше неже дванадесяте легеона ангел предстояша в веси Гефсиманийстей Господу Славы, пламенеюще попалити огнем небесным иудеов безумных, обаче како сбудутся писания рече Господь, сице же и Помазанник Божий страстотерпец царь Николай, имяше вящше неже дванадесяте легеона вой земных, препоясанных, оболченных, оружных, обаче предается со чады своя в руце беснующагося народа своего.

 

Исполняти лишения скорбей своих во плоти нашей апостолом повелел еси Господи, темже и вернии послушницы Твои, святии Царственнии Мученицы запинание от ближняго воеводы, ударение прикладом, угрозы заплевания и угрозы насилия над чады претерпели суть, еще же и посмертное поругание мощей ваших людьми русскими яко славу Христову прияли суть.

 

Егда рече Господь ко пришедшим яти Его иудеом «Аз есмь, везде Сый и вся исполняяй», тии идоша вспять и падоша на земли, егда же другий иуда, воевода царю напрасно тезоименный, понуждая господина своего решатися на отречение, даже пхаше царя, тогда испровержеся слава русская, тогда клятва страшная падоша на ны и на чада наша, тогда помрачи лице Свое на землю нашу Солнце Правды Христос Бог.

 

Не прикасайтеся помазанным Моим, глаголет Господь, ты же, царю мучениче, всех простивый, тепле за новаго иуду, воеводу тебе запинающаго, Бога молил еси: темже страшная смерть воеводы сего милость воистину царская сему явися, избавляющи онаго от смерти вечныя.

 

Ничесоже отвещаваше Господь Ироду вопрошающу, смрадом закваски онаго оскорбляем, мы же убоимся молчания Государева, ничесоже рекшаго новым правителем привременным, зрети отрекшагося царя вожделевшим, Царство Небесное соглядавшим и ничесоже узревшим.

 

Содержим любовию по воям русским моляше Бога царь Николай, да приведет их к победе великомученик Георгий, вои же русстии ударом приклада своему владыце отвещаша. Он же, грудь свою за оных грехи подставляя, грудию встати за него клявшихся, никакоже молитвы оставляше, и исполнися молитва государева чрез двадесять и осмь лет.

 

Се оставляется вам дом ваш пуст, ветхому Израилю рече Господь, дондеже не возглаголете: благословен грядый во имя Господне Иисус Христос Сын Божий, такожде и на месте Руси Святей зрим мерзость запустения, якоже и Государь рече: аще быша вси людие просили его, никогдаже приял бы скипетр и державу земли Российския, обаче жезлом и палицею Царствия Небеснаго утешает всех стремящихся в горняя.

 

 

Слава, глас 6:

Камень, егоже небрегоша зиждущии архиереи российстии, святый великомученик царь Николай/, сей бысть Христом Богом, Каменем Живота Вечнаго/, на служение Церкви Российстей поставлен/, да спасутся во Христе чада ея/. Тии же архиереи уподобишася мужу юродиву/, иже созда храмину свою на песце/, ограждением сим святым гнушашеся/, и сниде дождь гнева Божия на землю Русскую/, и приидоша реки беззакония/, и возвеяша ветри со стран западных/, и опрошася храмине той в лютом гонении/,  мы  же  да  строим  спасение  наше/,  ничесоже своего ищуще/, молящеся святым страстотерпцем царственным.

 

И ныне:

Кто Тебе не ублажит, Пресвятая Дево; кто ли не воспоет Твоего Пречистаго рождества; безлетно бо от Отца возсиявый Сын Единородный, Тойже от Тебе Чистыя пройде, неизреченно воплощься, естеством Бог Сый, и естеством быв человек нас ради, не бо двою лицу разделяемый, но во двою естеству неслитно познаваемый: Того моли, Чистая, Всеблаженная, помиловатися душам нашым.

Стихиры на литии, глас 4:

Прикровение имуще злобы свободу, узилище ваше тобольское «домом свободы» нарицали суть, обаче не ведаша, яко царственнии мученицы познаху Христа-Истину, Он же содела их свободними: несть бо свободы, яже не во Христе Иисусе: мученицы же царственнии во имя Господа собрани быша, и Господь бысть посреде их, темже и они быша во Христе Свободе истинней.

 

Тринадесять лет у державнаго деда в послушании был еси, и паки тринадесять лет у державнаго отца твоего в послушании был еси, святый мучениче царю Николае, и двадесять и три года сердце твое в руце Божии предавал еси, темже и молитвы твоя за ны блудныя послушает Христос Бог.

 

О страстотерпче святый! Храмы тьмочисленными землю Русскую украсил еси, и ни един от клира сего Тайнами Небесными пред смертию твоею тебе напутствоваше, днесь же новыи храмоздатели громко трубяще о храме единем, глумятся над Тайнами Христовыми.

 

Славаглас 5:

Егда гортань Димитриев не можаше провещати страшное убиение царевичево, тогда кампан собора углическаго громогласно детоубийство возвестил есть, оный же ирод во град Тобольск свидетеля медна сосла, аможе за свидетельство Христово Государь-мученик последовал есть.

 

И ныне, глас тойже:

Храм и Дверь еси, Палата и Престол Царев, Дево Всечестная: Еюже Избавитель мой Христос Господь во тьме спящым явися, Солнце Сый Правды, просвети хотя, яже созда по образу Своему рукою Своею. Темже Всепетая, яко Матерне дерзновение к Нему стяжавшая, непрестанно моли спастися душам нашым.

 

Стихиры на стиховне, глас 2:

Якоже бремя неудобьносимое/ для народа твоего ты бяше/,  темже  и  стражницы  твои  владыкам  своим/  о тебе, якоже о бремени бездушнем, писаху ты же, о дивный светильниче любве и кротости/, каждому ближнему твоему,  даже  стражником/,  слово  ободрения,  слово смирения/, слово воистину отеческое имел еси/, преизбытком жизни твоея во Христе/, пустыню сирых их душ напоевая.

 

Показуют нам Царственнии мученицы/ яко семья есть тайна Божия/, яко вящшее мучение им бысть/ в расторжении семьи истязательми/, страшное же чудо народа русскаго есть/, яко множество лет жительствующе без царяпомазаннаго Богом во отцы народу/, не вопием ему гласом велиим/: согрешихом на небо и пред тобою,/ о царю святый.

 

 

Слава, и ныне:

О чудесе новаго всех древних чудес! Кто бо позна Матерь без мужа рождшую, и на руку носящую всю тварь Содержащаго; Божие есть изволение, рождшееся. Егоже, яко Младенца, Пречистая, Твоима рукама носившая, и Матерне дерзновение к Нему имущая, не престай молящи о чтущих Тя, ущедрити и спасти души наша.

 

 

Тропарь, глас 3:

Отеческия десницы твоея удалихомся безумно, овцы без пастыря, пасем свиния страстей своих, в злых расточихом еже нам предал еси богатство державы твоея, темже, о царю Николае, народ твой ти блуднаго глас приносит: согрешихом пред тобою тягчее Хама, страстотерпче святый, приими нас кающихся всем животом нашим, и сотвори нас паки раби твои, наемники за молитву твою о прощении грехов наших.

 

НА УТРЕНИ

 

По 1-й кафисме седален:

Яко три спиры влекоша Царя из Тобольска в Тюмень-град: овая вожделяше свободити Государя земных уз, овая помышляше от скверноубийц свободити, третия от десныя и шуия свободы его сохраняше, многоценнаго сего бисера желающи продати немцем, сам же царь-мученик во Христе преизбыточественно свободный, кротце моляше Держащаго всю тварь да не попустит Милостивый Господь семью разлучити, и удержа Вседержитель простерших руки мерзкия убити удерживающаго.

 

Слава и ныне:

Радуйся, Святая Горо и Богопроходная. Радуйся, одушевленная Купино и неопалимая. Радуйся, Едина к Богу мiрови Мосте, преводяй мертвыя к вечному животу. Радуйся, нетленная Отроковице, неискусомужно рождшая Спасение душ наших.

 

По 2-й кафисме седален:

Бесоводимии стражницы чад царевых, егда кораблецем оных в Тюмень гоняху, двери в чертоги им нощию затворити возбраняша, ругатися им хотяще, темже врата адова оным отверсты страшно явишася, муку нестерпимую блудников показующе. Сии же, и царевича дверь затвориша тою же нощию, затворивше себе двери Царства Небеснаго, аще ни страстотерпцы царственнии помолятся о них.

 

Слава и ныне:

Неискусобрачная Невесто Богородительнице, яже Евину печаль радостно творившая, воспеваем вернии и поклоняемся Тебе, яко возвела еси нас от древния клятвы: и ныне моли непрестанно Всепетая, Пресвятая, во еже спастися нам.

Стихира по 50-м псалме, глас 8:

Егда внидоша царственнии мученицы в дом Ипатиев, бысть Господь грядый на вольную страсть, они же в горници светлей, устланной, приготовленной всем их житием предитекшим, светильники свои украшаху, Дванадесятию Евангельми ихже сам царь-мученик купно со врачем Евгением славным, чтоста во ушию всей Руси Святей. Оле врачей нынешних, кии токмо именем врачи нарицаются, суть же детоубийцы мерзейшии. Оле правителей нынешних, кии оных чад убиенных в снедь адскую потребляют. Молитвами царственных мучеников спаси, Господи, душы младенцев закалаемых, растлеваемых и снедаемых, нас же грешных, спаси, Господи, от участи сих врачей и правителей.

 

КАНОН

СВЯТЫМ ЦАРСТВЕННЫМ

ВЕЛИКОМУЧЕНИКАМ.

 

Глас 6.

 

Песнь 1.

Ирмос: Яко по суху пешествовав Израиль, по бездне стопами, гонителя фараона видя потопляема, Богу победную песнь поим, вопияше.

 

Припев: Святии царственнии мученицы, молите Бога о нас.

 

Якоже схождаше Господь во Едем древний, взыскуя овча погибшее, во единем часе временне обетшавшаго Адама, такожде святии царственнии мученицы, якоже в рай схождаху, в страшный оный подвал, взыскующе клятвы в монастыре Ипатиевом принесенныя: о народе русский, где еси?

 

Якоже Иаков зряше не токмо восхождение, но и нисхождение ангельское в Лествице, Еяже глава досязаше до небес, такожде и ангели земли нашея схождаху в оный страшный подвал, благовестие прощения народу русскому кровию своею извещающе.

Якоже из тьмы египетстей надлежало есть изыти по дну бездны, такожде и державный изводитель народа нашего от тьмы греховныя, аще и схождаше в оный мрачный подвал, никакоже схождаше со камене заповедей Твоих, Господи.

 

Аще и схождаше Даниил в ров ко львом рыкающим, обаче и сии смирением славляху Бога его, сице же, камение жесточайшее, скверноубийцы ипатиевския, аще и кроме воли своея, славляху Бога, мощи телеса убиенных Царственных мучеников нарицающе.

 

Песнь 3.

Ирмос: Несть свят якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

 

Плод веры и долготерпения несумнительно Богу принесе Авраам, единороднаго Исаака, темже и единородный царевич Алексий сеется отцем своим в грядущий плод веры нашея.

 

Буди имя Господне благословенно во веки: по смерти чад своих Иов праведный отвещаваше искусителем своим, царь же мученик, аще и провидя смерть чад своих: никто как Бог кротце отвещавал есть.

 

Чадо старости, чадо молитвы Иоанн Предтеча бысть, главу свою сложи рукою блудничею, обаче несть больший в пророцех Иоанна, ты же чадо молитв и многих скорбей, воин непобедим за Русь Святую являешися, о Алексие царевиче, аще и безпомощен во убиении твоем явился еси.

 

БогородиченО Всепетая Дево, Мати Творца! Четыренадесяти лет сущи, в смертней угрозе глаголала еси: «Се раба Господня, буди Ми по глаголу Твоему». Твою веру и любовь Ты Сама в сердце четыренадесятолетнему царевичу в смерти его вложила еси.

 

Седален по 3-й песни:

Якоже глаголют буесловы нынешнии святителя Николая никогдаже бывша, зане рукописания его несть на соборе Никейском, сице же тщатся превратити бытие царя-мученика: ради маловерных, суеверных и неверных нас, попустил есть Господь быти художеству света, образ царя фаворски в сердцах наших напечатлевая, яко икону и яко мощи его подавая нам.

 

Песнь 4.

Ирмос: Христос, моя сила, Бог и Господь, честная церковь боголепно поет взывающи, от смысла чиста о Господе празднующи.

 

Аще не обратимся и не будем яко чада царевы, яже не мстити за отца нас молят, яже ангельскима очима зрят еще умножение зла, яже токмо любовь глаголют побеждающую, никакоже внидем аможе они.

 

Егда убийцы царевы писаша мучеником письма льстивныя, бежати из заточения их понуждающе, тогда святая мученица царевна Анастасия, воскресити их души тщащися, бежати пролития крове их моляше, ко льстивым пишущи, яко к преискренним, токмо царственную кровь принести владыце Христу вожделевши.

 

Мученица святая царевна Мария образ Божий во стражницех  своих  прозреваше,  якоже  и  сестры  ея дивляхуся, яко каменносердечие оных иродов подвигашеся, сия же святая мученица Мария ангелу подобно схождаше на камень гробный сердец их, свет воскресения им являющи.

 

О святая мученице царевно Татиано: погубила еси душу твою в животе привременнем, вземши Крест Христов, родителей место брату и сестрам заступающи, тем же и обрела еси живот вечный, Царство Небесное.

Песнь 5.

Ирмос: Божиим светом Твоим, Блаже, утренюющих Ти душы любовию озари, молюся, Тя ведети Слове Божий, истиннаго Бога, от мрака греховнаго взывающа.

 

Брак честен венцы стяжает, севастийстим равночестнии. О святии супрузи царственнии: брак ваш венчал есть Христос Бог венцы мученическими.

 

Шесть водоносов вином сладким благ земных во браце содела в Кане Господь, сладчайший же небесный водонос Ты Сый, Святый, Крепкий, Безсмертный, тем же и святии супрузи царственнии во сокровищнице заключения своего седьмым водоносом субботствовали.

 

Вино Каны Галилейския стремится в Жизнь Вечную, Ты же, Господи, мученичеством венчая венценосцев венчанных, подаеши им чашу Твою гефсиманийскую, кровию царственных мучеников вечною Русь Святую соделовая.

 

Кровию Христовою чрез все житие упоеваеми, достигоша во браце своем седьмаго тайнаго водоноса, иже есть Крест Христов: имже грядуще во Царствие Небесное, кровь свою Господу принесоста, стены же дома Ипатиева голгофски точаху кровь Христову в вашей крови.

 

Песнь 6.

ИрмосЖитейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

 

О всехвальныя Анны, царице спогребшияся: овая убо в телеси далече пребывающи, душею не разлучалася есть со госпожею своею, яко и скверноубийцы рекоша ея в подвале убиенною: овая же служительница сущи, не оставила есть царицу и в последнем покое, отнюдуже текла за нею в чертог Царя Небеснаго, аможе и нам помолися внити.

 

Радуйтеся, воини непобедимии Царя Небеснаго и земнаго, славнии боляре Василие, Илие и Феодоре: якоже вы жизнь цареву сохраняху до последняго часа, такожде и ваш живот вечным житием является во Христе Иисусе. Молитеся о нас, да не бросим оружия нашего, да не оставим поля браннаго самовольно.

 

Врачеве любезнии Евгение и Екатерино: истиннаго благородства и чистоты душевней пример показаста: терпением, верою и любовию врачеваста страдальцев царственных. Темже уврачуйте души наша от любви к мiру.

 

Святии слузи царевы Иоанне, Клименте и Иоанне: в малом верни бывше, над многими вас ставит Господь ваш: мнитеся боле достойни родоначальницы быти новых царей, неже внуцы изменников. Помолитеся о еже боле любити нам служити, неже властвовати.

 

Святая мученице болярыня Анастасия: ты рекла еси: яко в болиих страданиих большее утешение подает Господь: помолися убо, царем сострадавшая и совоскресшая Христу Богу нашему, любити нам наипаче славу крестную.

 

Страстотерпче, адаманту подобный, Петре: аще и инородный, аще и инославный был еси, но истинную свободу, следуя царю обрел еси, познав Христа, и верен свидетель Богу явился еси, житие царево в письмени запечатлевая.

 

 

АКАФИСТ

СВЯТОМУ ВЕЛИКОМУЧЕНИКУ

БЛАГОВЕРНОМУ ЦАРЮ НИКОЛАЮ

 

Кондак 1.

Взбранный воеводо рода русскаго, яко покаявшеся во злых, благодарственная восписуем ти раби твои, царю Николае. Но яко имея скипетр и державу необоримыя, аможе ты сам приведи, да зовем ти: Радуйся, царю Николае, Христом Богом царствующий.

 

Икос 1.

Ангел предстатель с небесе послан бысть в час отречения от тебе народа русскаго, отверзая, их же ухо не слыша, око не виде, и не леть словесы человеческими глаголати, мы же о гресе отцев сокрушающеся, зовем ти:

Радуйся, имже Святая Русь возсияет; радуйся, имже Господь Россию прощает.

Радуйся, падшаго народа воззвание; радуйся, отечества нашего избавление.

Радуйся чистото, неудобопятнаемая человеческими домыслы; радуйся, смирение, удивляющее ангельския воинства.

Радуйся, яко Христа носивый в сердце своем; радуйся, яко Церковь Его ограждавый.

Радуйся, звездо, страдания Христовы уяснившая; радуйся, крест Господень своим страданием украсивый.

Радуйся, нас ко Господу приводяй; радуйся, имже отечества земнаго и Небеснаго сподобляемся.

Радуйся, царю Николае, Христом Богом царствующий.

 

Кондак 2.

Видяще враги Христовы твою чистоту, клеветами и доныне тщатся житие твое помрачити. Ты же еще отрок сый, диаконски возглашал еси: «О благочестивейшем и самодержавнейшем». Мы же, слышаще из вечности сей глас твой, поем с тобою: Аллилуиа.

 

Икос 2.

Разум недоразумеваемый в твоем житии ищуще, удивляемся, како имя жениха матере и любимейшаго брата отца восприял еси, прежде жития тайныя лепоты Царствия Небеснаго в житии твоем восписуя, темже и поем ти:

Радуйся, имя усопшаго, любимаго отцем и материю восприявый; радуйся, тайну смерти и паки рождения в сем соединивый.

Радуйся, купно с державным праотцем во зраце молниене Богом посещенный; радуйся, страхом Божиим ничесоже, кроме греха, боятися наученный.

Радуйся, страстотерпчества Царя-освободителя бывый свидетель; радуйся, терпение в страданиях восприявый как добродетель.

Радуйся, мученической кончине своего деда сострадавый; радуйся, царскую диадиму мученическим венцем уяснивый.

Радуйся, блаженною Ксениею со всею семьею в Борках спасенный; радуйся, ангела земли, идеже Борки, прославивый.

Радуйся, солдатскую службу от юности возлюбивый; радуйся, воином Христовым до гроба бывый.

Радуйся, царю Николае, Христом Богом царствующий.

 

Кондак 3.

Сила Вышняго осени тогда отечество наше: от рождия Христова - Руси Святой, грозд ханаанский показа - благочестивейшаго из русских царей. Мы же молитвами его чающе пити новое вино во Царствии Божием вопием сице: Аллилуиа.

 

Икос 3.

Имея Богоприятную землю душу твою, праотцы и отцы твоими от Владимира Святаго тысящелетне удобренную, плод сторичен Господу купно со царицею и чады принесл еси. Мы же малое моление сие прилагающе к небесной славе твоей дерзаем тако пети тебе:

Радуйся, ромеев наследниче; радуйся, рода Романовых венче.

Радуйся, Христа в сердца наша возвращаяй; радуйся, тебе молящихся посещаяй.

Радуйся, отче народа русскаго; радуйся, его же токмо Сын Божий открывает.

Радуйся, яко в тебе сокрыто изобилие жизни вечныя и временныя; радуйся, готовое наше покаяние.

Радуйся, молитвенниче теплый за землю Русскую; радуйся, Сергие и Димитрие по чину Мелхиседекову.

Радуйся, возвращаяй сердца отцев детем; радуйся, каменная сердца наша пременяяй на плотяная.

Радуйся, царю Николае, Христом Богом царствующий.

 

Кондак 4.

Бурю внутрь имея помышлений сумнительных целомудренный цесаревич из воли Божия и родительския отнюд не дерзал есть. Темже, церковных венцев долготерпением, верою и любовию достигнув, благодарно Богу вопиял есть: Аллилуиа.

 

Икос 4.

Слышаша Пастыря пастырей в Ветсем и Новем Заветех глаголюща: яже Бог сочетал есть, человецы не разлучат никогдаже. Темже все упование на Него возложил еси. Мы же нетерпеливии и маловернии со страхом взываем ти:

Радуйся, сердце твое, иже в руцех Божиих, единожды возлюбившее никогдаже пременивый; радуйся, яко десятолетнее пождание твое Господь святою супругою увенчал есть.

Радуйся, из послушания воле отчей никогдаже выходивый; радуйся, волю Отца Небеснаго всегда ясно разумевый.

Радуйся, именем провозвестницы Евангелия прощения первеницу твою нарекий; радуйся, яко сия не мстити за убиение твое нам заповедала есть.

Радуйся, именем диакониссы римския дщерь твою вторую назвавый; радуйся, яко сия истинная служительница в церкве своей малой явилася есть.

Радуйся, яко третия дщи твоя благую часть избра, яже и не отнимется от нея; радуйся, яко сия язвы на ногу Иисусову уврачевала есть.

Радуйся, яко юнейшая дщи твоя воскресением называется; радуйся, яко четырьмя мудрыми девами мы от сластей мiра воскресаем.

Радуйся, царю Николае, Христом Богом царствующий.

 

Кондак 5.

Боготечную звезду жития твоего зрим на смеркающихся летописех российских и вселенских: житием твоим, светом и твердостию адаманту подобным, испытуются последующии владыки, мы же, токмо мимо шествовати слыша славу твою, слепцем подобно вопием о тебе Богу: Аллилуиа.

 

Икос 5.

Видеша иноплеменнии и инославнии святость жития твоего и святыя семьи твоея, удивляхуся народу русскому, таковаго сокровища не ценившему, тщашася сии своими талантами служити тебе, мы же, соотечественницы твои суще, согрешили на Небо и пред тобою, и уже не достойни нарещися сыны твои, но токмо вопием ти:

Радуйся, радуга многоцветная заповедей Христовых; радуйся, имже от потопа беззаконий моих избавляюся.

Радуйся, пастырю добрый народа русскаго; радуйся, душу свою за Христа, им распятаго, положивый.

Радуйся, врагов твоих и поныне нестерпимое жжение; радуйся, врат адовых вечное разрушение.

Радуйся, славо России незаходимая; радуйся, страстотерпцев надежный образе.

Радуйся, столпе веры Православныя; радуйся, твердое Церкве ограждение.

Радуйся, яко ты еси знамение пререкаемое; радуйся, яко тобою открываются помышления многих сердец.

Радуйся, царю Николае, Христом Богом царствующий.

Кондак 6.

Проповедник Богоносный бывый, многия страны вселенныя посетил еси, проповедав Христа всем самим явлением твоим. Темже и древний враг не терпя сего во главу попущением Божием уранил тя. Мы же радующеся спасению главы российския вопием Богу: Аллилуиа.

 

Икос 6.

Возсиявый на крайнем востоце просвещение истины, отгнал еси лжи тьму, нечестивии же, не терпяще сего, на жизнь твою покусишася. Князь же греческия страны отнюдуже вера Православная нам возсия спасе жизнь твою, еще страданий не исполнившуюся, темже и мы поем ти:

Радуйся, уранением во главу об опасности державе твоей предвозвещенный; радуйся, князем отечества Православия от сего спасенный.

Радуйся, смирения Христова поборниче; радуйся, уничижения царства твоего отнюд не терпевый.

Радуйся, блаженне миротворче евангельский; радуйся, удар отечеству твоему нанесенный твердо приявый.

Радуйся, в бедах бранных о милостех Божиих покаянно просивый; радуйся, милость Божию в рождении наследника приявый.

Радуйся, истощание крови царския сквозь все житие видевый; радуйся, авраамски сына своего жертвою за грех народа узнавый.

Радуйся, в измене лукаваго раба древнюю сеть уведевый; радуйся, единород пребывый ради Христа.

Радуйся, царю Николае, Христом Богом царствующий.

 

Кондак 7.

Хотящу воину некоему бородинскому от нынешняго века преставитися прелестнаго не благослови Христос Бог дондеже не узрит Новаго Чудотворца Николая, милость, суд и веру исполняющаго, дондеже не воспети ему о царе Богу: Аллилуиа

 

Икос 7.

Новую показа Русь Святую, онебесившуюся уже, яко несть на земли Русской покаяния. В ту же новую землю ни един русский без царя страстотерпца не внидет дондеже не запоет:

Радуйся, яко прикладом ударяемый токмо «за что, голубчик?» вопросивый; радуйся, темже твое есть Царство Небесное.

Радуйся, яко кровавыми слезами «измена, трусость и обман» написал еси; радуйся, яко на лоне Авраамове утешился еси.

Радуйся, яко кротце всех простил еси; радуйся, яко на веки землю Русскую наследовал еси.

Радуйся, яко страждущих тайно вином и елеем умащал еси; радуйся, яко Господь помиловал есть в тебе царство твое.

Радуйся, за охранение чистоты ближними возненавиденный; радуйся, яко зрением Бога выну истее причащаешися.

Радуйся, яко доныне поносят, иждевают, рекут всяк зол глагол лжуще на тебя ради Христа; радуйся, яко мзда твоя вечное Царствие Небесное.

Радуйся, царю Николае, Христом Богом царствующий.

 

Кондак 8.

Странное житие сына твоего видевше, устранимся мiра, ум на небеса преложше: како прежния и будущия судьбы отечества нашего житием сим изобразишася, мы же взор, яко орлиный, обретше, вопием: Аллилуиа.

 

Икос 8.

Весь бе в нижних, но и Руси Святыя заветов не отступи никакоже, святый страстотерпче царю Николае: ведяше, яко царство Русское крепко бысть Царствием Небесным, идеже не помогает ни богатство, ни крепость телесная, ни разум плотский, ни подвиги праотцев, но токмо любовь ко Господу, темже и Русь Святая тебе возглашает:

Радуйся, яко двух архиереев малоросских паки соединивый; радуйся, яко в любви их царство твое совершивый.

Радуйся, саровскаго столпника на раменах носивый; радуйся, славой крестною по молитвам его венчанный.

Радуйся, благоверных Анну и Евфросинию вознесый; радуйся, яко их молитвами Небеснаго Иерусалима неразлучно со чады достигнувый.

Радуйся, патриарха, Россию спасшаго, возвеличивый; радуйся, патриаршеством Россию спасти возжделевый.

Радуйся, Питирима Тамбовскаго обретый; радуйся, якоже и сей, бездомным храмоздателем явивыйся.

Радуйся, яко храмы тмочисленныя поставивый; радуйся, души безчисленныя ко Христу приведый.

Радуйся, царю Николае, Христом Богом царствующий.

 

Кондак 9.

Всякое естество ангельское и человеческое удивися великому твоего самоумаления делу: како во всем житии твоем воле Божии послушлив был еси даже до смерти, никакоже свою волю творя, но взирая на крест Господень. С сими же силами небесными и верными человеки и мы вопием: Аллилуиа.

 

Икос 9.

Ветия многовещанныя, яко рыбы безгласныя, видим о тебе, царю мучениче, яко сии, на лжеименный разум полагающеся, дерзают безбожными усты судити тя, в волю Божию предавшагося. Ты же в молчании проходиши многоскорбное твое житие, яко же Господь во дворе первосвященничестем, мы же взор твой сретающе, вопием ти:

Радуйся, яко новыя страны народом русским населил еси; радуйся, яко сей народ твой злаго врага победил есть.

Радуйся, яко в совете и любви с твоим народом жити желавый; радуйся, яко народ свой для совета и любви призвавый.

Радуйся, аще и в совете сем врата адовы обретый; радуйся, яко твоея любве к народу сии не одолеша.

Радуйся, яко от наемных пастырей Церковь Русскую сохранивый; радуйся, яко тайныя помышления их проницавый.

Радуйся, аще и в патриаршестве твоем князьми Церкве отвергнутый; радуйся, яко не надеялся еси на князи, на сыны человеческия.

Радуйся, аще и князи сии удалишася на страну далече; радуйся, яко первых простил еси их, первыми тебе прославивших.

Радуйся, царю Николае, Христом Богом царствующий.

 

Кондак 10.

Спасти хотя отечество твое от распри междоусобныя, вдался еси, яко овча безгласное в руце известных врагов твоих, поношения, оскорбления и унижения от народа твоего терпя, нас непокоривых научая смирению да воспоем Богу: Аллилуиа.

 

Икос 10.

Стена еси всем сыновом российским во обстояниех последняго времени царю Николае избавляя от нежданно находящих на ны по грехам нашим: защищая от вздымающихся волн моря житейскаго. Тобою бо твердость обретаем, темже и поем ти:

Радуйся, стено необоримая Церкви Христовой; радуйся, мiра всего зло удерживаяй.

Радуйся, яко вопиеши со Михаилом Архистратигом: «станем со страхом»; радуйся, видит бо Господь сие стояние яко добро.

Радуйся, яко ты обновляеши кающийся народ-детоубийцу; радуйся, яко ты молишися за нерожденных чад русских.

Радуйся, растлителей России наказуяй; радуйся, чистоту детскую охраняяй.

Радуйся, Россию паки Господу уневестивый; радуйся, наше непреложное будущее устрояяй.

Радуйся, православные браки созидаяй; радуйся, блудных чад отцем возвращаяй.

Радуйся, царю Николае, Христом Богом царствующий.

 

Кондак 11.

Пение всякое побеждается приникающе к страстем Господним, тем же и мы, созерцающе христоподражательныя страдания твоя, затворяем недостойныя уста наша, тишина же ангельски гремит: Аллилуиа.

 

Икос 11.

Светоприемную свещу сущему во тьме и сени смертней народу зрим тя, царственный страдальче: тихо, яко свеча, и прямо, и горе устремленно житие твое, и горяча, яко огнь, любовь твоя к народу твоему, тем же и наша сердца возжизает пети тебе сице:

Радуйся, душу за сербския други своя положивый; радуйся, яко взял еси крест войны всемiрныя и себе отверглся еси.

Радуйся, аще и ближними воеводами преданный; радуйся, их же лобзанием простил еси.

Радуйся, с народа грех клятвопреступления вземый; радуйся, чашу горькую в народа место испивый.

Радуйся, яко Господу во смирении уподобился еси; радуйся, яко малую церковь твою на заколение вел еси.

Радуйся, яко жертвою всесожжения сына твоего принесл еси; радуйся, яко горлицами за грех народа дщери твои принеслися суть.

Радуйся, егоже Бог с народом сочета и человецы не разлучиша; радуйся, яко Пасха русская явился еси.

Радуйся, Царю Николае, Христом Богом царствующий.

 

Кодак 12.

Благодать дати восхотев людем своим, егда за грехи тяжкия и общее отступление во многих изсяче любы, посла нам ангела хранителя земли Русския Новаго Николая Чудотворца. Он же рукописание грехов наших раздирая, присно Богу поет: Аллилуиа.

 

Икос 12.

Поюще твое долготерпение, хвалим тя вси, лествице покаяния народа нашего: степени схождения твоего в подвал дома Ипатиева, степени восхождения от тьмы греховныя народу твоему явилися суть. Тем же и бездна чудес тобою нам подается, научая пети всех:

Радуйся, яко святитель Николай тебе молитися призывает; радуйся, по смерти Победоносцем явивыйся.

Радуйся, Давиду кротостию, и Соломону мудростию уподобивыйся; радуйся, из тьмы кромешныя и топи изводящий.

Радуйся, безплодной матери райский плод подаяй; радуйся, яко послушливому иерею со дна источника крест подал еси.

Радуйся, из темницы изводяй; радуйся, всякое прошение исполняяй.

Радуйся, всякую болезнь врачуяй; радуйся, в пути сшествуяй.

Радуйся, гонителей твоих, алчущих и жаждущих правды, превращаяй; радуйся, помощниче прежде прошения нашего.

Радуйся, Царю Николае, Христом Богом царствующий.

 

 

Кондак 13.

О, великий Боговенчанный страстотерпче царственный мучениче Николае! Чрез все житие твое страдальчествовати изволил еси, блудным сыновом российским имение разделяя. Наконец же свою и чад своих кровь источил еси, Христу подобяся, да обратимся, и приидем в себе, и воспоем о тебе Богу: Аллилуиа.

 

(Сей кондак глаголи трижды.

И паки чтется 1-й икос и 1-й кондак.)

 

 

Песнь 7.

ИрмосРосодательну убо пещь содела ангел преподобным отроком, халдеи же опаляющее веление Божие мучителя увеща вопити: благословен еси Боже отец наших.

 

Нощь несветла приниче на землю Русскую, егда отреклся есть народ от Царя Небеснаго: и воздремашася вси, и спяху любящии Христа, тогда ты, о царице мученице Александро Новая, яко юница течаше внезапу слышавши: «Се Жених грядет»: зрящи во образе мужа твоего иудеями поруганнаго Христа.

 

О како буесловнии пишут, яко токмо мужа в царе любляше ты, о страстотерпице царственная Александро Новая: ты, яже преклоняше колене пред Помазанником Божиим в священнем короновании, ты, яже Иовом Многострадальным его именоваше, ты, яже об отречении услышавшая «буди мне и чадом моим по глаголу Твоему» кротце рекла еси.

 

Егда все царство твое чужестранною тебе, о царице, нарицаше, ты, о страстотерпице неколеблемая, о любви к России глаголала еси, разлучения с нею не терпящи, нас, грешных, научающи во утрате любве ко Отечеству утраты адамовыя страшитися.

 

Кая из матерей христианских не похвалит тебе, о царице? Зане всех лучше брак дщерей твоих устроила еси, чрез небесное сие родство страну нашу паки Богу уневестивши.

 

Песнь 8.

Ирмос: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

 

О како все твое царствование лествица дома Ипатиева изобрази: оное схождение твое по степенем послушания воли Божией царственное воистину снисхождение к народу твоему зрящим является.

 

О како нисходиши ты степеньми страстотерпчества, царственно воистину самоумаляяся, юнца питомаго сына твоего на руку нося, о како доныне мы не приидем в себе, како не возглаголем: царю святый, согрешихом на небо и пред тобою.

 

Волю едину на небесех святии имут, тем же Царство Небесное дом Ипатиев бысть, зане едину волю ко схождению даже до ада за грехи народа своего царственнии мученицы имеша.

 

О мати святая царице: аще ли сердце твое не провеща ти, чад твоих камо ведут степени сии? Но уневестившая чад твоих Жениху Христу, помолися о чадех Российстих.

 

 

Песнь 9.

ИрмосБога человеком не возможно видети, на Негоже не смеют чини ангельстии взирати: Тобою же, Всечистая, явися человеком Слово воплощенно, Егоже величающе с небесными вои, Тя ублажаем.

 

«Не прикасайтеся помазанным Моим» рече Господь громы  и  молниями  в  подвале  клятвеннем:  темже  да не льстятся скверноубийцы, яко повержен бысть царь: но Русь, прежде святая, паде и превратися: на месте святе  царство  сатанино  от  полунощи  той  и  доныне углубляется.

 

Сонмище правителей привременных надолзе искаху осудити царицу-мученицу: и ни единей вины обретеся на ней: се не терпяще чистоты и святости ея, смертию сияние сие погасити тщатся: обаче страстотерпица за имя Божие смерти не узрит во век: от часа сего жены их - жены лотовы, жены иововы, иезавели и иродиады: и иных не будет правителем страны сия за кровь Александры Новыя.

 

Како самыя пули проповедаша Царство Божие пришедшее в силе: не можаху бо царевен-мучениц ископати: возвращахуся бо мечущим оныя, безумие их обличающе, сих же бисеров, дражайших всех мiрных сокровищ, собра Себе в диадиму Христос Бог.

 

Присно живет царевич Алексий: в смерти его оправдашеся страдальческое житие его: яко долее всех удерживал есть смертное мучение его Господь: яко и ныне множицею в закалаемых младенцех свидетельствует отрок сей святый Христа Бога жива.

 

 

Ексапостиларий:

Свет оружный в подвале дома Ипатиева свет путеводный явися во мраце жития нашего: вемы непреложне чесо взыскует Господь от верных раб Своих, зрим славу крестную и рай отверстый, житие вечное.

 

 

Слава, и ныне:

Пресвятая Владычице наша Дево Мати Творца: Купиною Неопальною явися в пустыни жизни нашея: зриши, яко сгораем страстьми нашими: попали убо всякую скверну и очисти и спаси души наша, да узрим славу Сына Твоего и святых царственных мучеников.

 

На хвалитех, глас 4:

 Кто есть от вас народ, его же аще воспросит отец его хлеба, камень подаст ему? Се просит державный отец у христиан своих хлеба для ратнаго труда: се каменносердечие прелагают ему чада: ни тебе, ниже супостату твоему хлеба дамы: пожди, егда унши будет.

 

Егда многая лета дома твоего, о царю святый, сердца верных веселили суть, множицею тогда народ вопиял «осанна», даже до выи в воду сходя вслед ладьи твоей: и абие по шести летах сей же народ искаше лице твое заплевати, детей твоих умучити, мняще Бога не суща: но и поныне нет о сем покаяния.

 

Се не зде или онде: но окрест измена и трусость и обман: несть помогаяй, вси уклонишася, вкупе неключимы быша, но никто как Бог, рече Помазанник: буди имя Господне благословенно: и отвещая, отвещавает сему Отроковица Богомати: сей от рода Нашего: ей, гряди Серафиме, прослави царя, тя прославльшаго.

 

 

Слава:

В страшный день отречения вси людие русскии знаменоваша одежды своя цветом крови, иудеом древлим подобящеся: кровь его на нас и на чадех наших вопиюще: мы же, о царю-мучениче святый, во одеждах пасхальных поем ти, яко в тебе воскресение земли нашея.

 

 

И ныне. Богородичен.

 

 

По совершении отпуста выходим на литию

И поем стихиры Пасхи.


 

НА ЛИТУРГИИ

 

МОЛИТВА

ко Святому Великомученику

Благоверному Царю Николаю

 

О, святый великомучениче, победоносче и целебниче царю Николае! Вопрошая, яко Исаак Авраама, Господа вопрошал еси: Где есть овча, еже во всесожжение? И, отвещая, отвещал еси Владыце твоему: Аще потребна жертва за Русь Святую, аз есмь жертва сия. Сим же, яко первосвященник за грехи народа твоего, ходатай не без крови ко Престолу Троицы Святыя пришед, моли о нас, о страдальче пятдесятолетний, Бога твоего, да не убоимся страданий за Христа; и, якоже привел еси народ твой к славной победе над злым врагом, поне и чрез двадесять и осемь лет сице приведи и нас к победе над злою волею нашею и над врагами царства твоего; и, яко уневестил еси семью твою Небесному Жениху, сице и сирых младенцев русских напитай, ухлеби, уцеломудри; и, яко же Новый Николай Чудотворец, сшествуй нам тесным путем, ко Христу приводящим. О, дивный воеводо рода русскаго! Поборствуй Руси Святой противу новаго ига, агарянскаго и ляшьскаго злейша; накажи, но помилуй, попали, но исцели: умоли Господа и Пречистую Матерь Его не быти в конец оставленней земли нашей. Да будет на нас державная воля твоя. Да будет с нами отчая милость твоя; и, яко умножися вопль содомский от земли нашея, призри милостивно на ны, яко же и Господь Бог наш в Троице славимый древле посети любовию Своею оныя содомляны; тако да очистит ныне и нас Бог огнем любве твоея. Аминь.

 



[1] Служба с акафистом написана в России. Печатается по изд.: Воскресенье земли Русской. М. «Русский хронограф». 1999. С. 3-20; Русская Пасха. М. «Русский хронограф». 1999. С. 3-31.

 


скачать


Вернуться

Copyright © 2009 Наша Эпоха
Создание сайта Дизайн - студия Marika
 
Версия для печати